துபாயில் சூர்யாவின் ‘சீன்’ பட இசை வெளியீட்டு விழா! அக்டோபர் 25-ம் தேதி பிரம்மாண்ட நிகழ்ச்சி!

நடிகர் சூர்யா நடிப்பில் உருவாகியுள்ள ‘சீன்’ திரைப்படத்தின் இசை வெளியீட்டு விழா துபாயில் நடைபெற உள்ளதாகப் படக்குழு அறிவித்துள்ளது. வரும் அக்டோபர் 25-ம் தேதி மாலை 6 மணிக்கு துபாயில் உள்ள சிலிக்கான் சென்ட்ரல் மாலில் இந்த நிகழ்ச்சி நடைபெற உள்ளது. இதனால் சூர்யா ரசிகர்கள் உற்சாகமடைந்துள்ளனர்.

சூர்யா 47-வது படம்!

மலையாளத்தில் ‘ஆவேஷம்’ படத்தை இயக்கிய ஜித்து மாதவன், இந்தப் படத்தை இயக்கியுள்ளார். சூர்யாவின் 47-வது திரைப்படமான இதில், அவர் காவல்துறை அதிகாரியாக நடித்துள்ளார். நடிகை நஸ்ரியா நசீம் கதாநாயகியாகவும், நஸ்லென், லால், ஆனந்தராஜ், ராஜ்பிரியன் உள்ளிட்டோர் முக்கிய கதாபாத்திரங்களிலும் நடித்துள்ளனர்.

சூர்யா மற்றும் ஜோதிகாவின் 2டி என்டர்டெயின்மென்ட் நிறுவனத்துடன் இணைந்து ழகரம் ஸ்டூடியோஸ் இப்படத்தைத் தயாரித்துள்ளது. படத்திற்கு சுஷின் ஷ்யாம் இசையமைத்துள்ளார். வினீத் அகஸ்டியன் ஒளிப்பதிவு செய்துள்ளார்.

வைரலான பாடல்கள்!

இப்படத்திலிருந்து ஏற்கெனவே ‘ஆத்தி யார்ரா இவ’ மற்றும் ‘ஏரோபிளேன்’ ஆகிய பாடல்கள் வெளியாகி ரசிகர்களிடையே கவனம் பெற்றுள்ளன. பாடல்களுக்கு கிடைத்த வரவேற்பால் படத்தின் மீதான எதிர்பார்ப்பும் அதிகரித்துள்ளது.

இந்நிலையில், துபாயில் நடைபெறவுள்ள நிகழ்ச்சி படத்தின் விளம்பரப் பயணத்தில் முக்கியமானதாக அமையும் என எதிர்பார்க்கப்படுகிறது. இந்த நிகழ்ச்சியில் இசை வெளியீடு நடைபெறும் என அறிவிக்கப்பட்டுள்ள நிலையில், படத்தின் டிரெய்லரும் வெளியாகுமா என்ற எதிர்பார்ப்பும் ரசிகர்களிடையே எழுந்துள்ளது. எனினும், டிரெய்லர் வெளியீடு குறித்த அதிகாரப்பூர்வ உறுதிப்படுத்தல் வெளியாகவில்லை.

நவம்பர் 6-ம் தேதி ரிலீஸ்!

‘சீன்’ திரைப்படம் வரும் நவம்பர் 6-ம் தேதி தீபாவளியை முன்னிட்டு உலகம் முழுவதும் திரையரங்குகளில் வெளியாக உள்ளது. சூர்யா, நஸ்ரியா கூட்டணி முதல்முறையாக இணைந்துள்ளதால் இப்படத்திற்கு ரசிகர்கள் மத்தியில் எதிர்பார்ப்பு அதிகரித்துள்ளது.