“ராவணனாக ஏன் நடிக்கிறீர்கள்?” – கேள்வி எழுப்பியவர்களுக்கு யஷ் சொன்ன பதில்!
நடிகர் யஷ், நிதேஷ் திவாரி இயக்கத்தில் உருவாகி வரும் ‘ராமாயணம்’ திரைப்படத்தில் ராவணன் கதாபாத்திரத்தில் நடித்து வருகிறார். ரன்பீர் கபூர் ராமராகவும், சாய் பல்லவி சீதையாகவும் நடிக்கும் இப்படம், இந்தியத் திரையுலகில் பெரும் எதிர்பார்ப்பை ஏற்படுத்தியுள்ளது. இந்நிலையில், ராவணன் போன்ற எதிர்மறையான கதாபாத்திரத்தைத் தேர்வு செய்தது ஏன் எனப் பலரும் தன்னிடம் கேள்வி எழுப்பியதாக யஷ் தெரிவித்துள்ளார்.
‘கேஜிஎஃப்’ திரைப்படத்தின் மூலம் இந்திய அளவில் பிரபலமான யஷ், ‘ராமாயணம்’ படத்தில் ராவணனாக நடிப்பதுடன், படத்தின் தயாரிப்புப் பணிகளிலும் பங்கேற்றுள்ளார். அவர் விரும்பியிருந்தால் ராமர் கதாபாத்திரத்தைக்கூடத் தேர்வு செய்திருக்கலாம் என்ற நிலையில், ராவணன் கதாபாத்திரத்தைத் தேர்ந்தெடுத்ததற்கான காரணம் ரசிகர்களிடையே கவனம் பெற்றுள்ளது.
இதுகுறித்துப் பேசிய யஷ், ராமரின் நற்பண்புகளைச் சிறப்பாக வெளிப்படுத்த வேண்டுமென்றால், அதற்கு இணையான வலிமை கொண்ட எதிர்க்கதாபாத்திரமும் அவசியம் எனக் குறிப்பிட்டுள்ளார். ராவணன் வலிமையான கதாபாத்திரமாக இருந்தால்தான் ராமர் அவரை வெல்வது திரையில் சிறப்பாக அமையும் என்பதே தனது எண்ணம் என்றும் தெரிவித்துள்ளார்.
மேலும், ராவணன் கதாபாத்திரத்தில் நடிப்பது ஒரு நடிகராகத் தனக்குப் பெரும் சவாலாக இருப்பதாகவும் யஷ் கூறியுள்ளார். ராமாயணக் கதை பல தலைமுறைகளாக மக்களுக்குப் பரிச்சயமானது என்பதால், ஒவ்வொருவருக்கும் ராவணனைப் பற்றிய தனிப்பட்ட கற்பனையும் பார்வையும் இருக்கும். அத்தகைய சூழலில், அந்தக் கதாபாத்திரத்தை வித்தியாசமான முறையில் திரையில் கொண்டுவருவது முக்கியம் என்றும் அவர் தெரிவித்துள்ளார்.
ராவணனின் பல்வேறு குணங்கள், அவருடைய செயல்களுக்குப் பின்னால் இருக்கும் நோக்கம் ஆகியவற்றைப் புரிந்துகொண்டு கதாபாத்திரத்தை அணுகியதாகவும் யஷ் குறிப்பிட்டுள்ளார்.
ரன்பீர் கபூர், சாய் பல்லவி மற்றும் யஷ் உள்ளிட்ட முன்னணி நட்சத்திரங்கள் இணைந்துள்ள ‘ராமாயணம்’ திரைப்படம் இரண்டு பாகங்களாக வெளியாகத் திட்டமிடப்பட்டுள்ளது. இதிகாசக் கதையைப் பிரம்மாண்டமான காட்சியமைப்பில் திரைக்குக் கொண்டுவரும் முயற்சியில் படக்குழுவினர் ஈடுபட்டுள்ளனர்.
