புதுப்பிக்கத்தக்க எரிசக்தியில் ரூ.20 லட்சம் கோடி முதலீட்டு வாய்ப்பு – பிரதமர் மோடி தகவல்!

இந்தியாவின் எரிசக்தி பாதுகாப்பை உறுதி செய்வதில் புதுப்பிக்கத்தக்க எரிசக்தி முக்கியப் பங்கு வகிப்பதாக பிரதமர் நரேந்திர மோடி தெரிவித்துள்ளார். டெல்லியில் நவம்பர் 2ஆம் தேதி நடைபெற்ற பாரத் புதுப்பிக்கத்தக்க எரிசக்தி உச்சி மாநாடு மற்றும் கண்காட்சியைத் தொடங்கி வைத்து அவர் இதனைத் தெரிவித்தார்.

மேற்கு ஆசியாவில் நிலவும் நெருக்கடி உள்ளிட்ட சர்வதேசப் பிரச்சினைகளுக்கு மத்தியில், கடந்த பத்தாண்டுகளில் இந்தியா மேற்கொண்ட தூய்மையான எரிசக்தி முதலீடுகள் நாட்டின் பொருளாதாரப் பாதிப்பைக் குறைக்க உதவியதாக மோடி குறிப்பிட்டார். எரிசக்தி பாதுகாப்பு என்பது பொருளாதாரப் பாதுகாப்புடன் நேரடியாகத் தொடர்புடையது என்றும், புதைபடிவ எரிபொருட்களை அதிகம் சார்ந்திருப்பதைக் குறைத்து தூய்மையான எரிசக்திக்கு மாற வேண்டும் என்றும் வலியுறுத்தினார்.

கடந்த பத்தாண்டுகளில் புதுப்பிக்கத்தக்க எரிசக்தித் துறையில் ரூ.15 லட்சம் கோடிக்கும் அதிகமாக முதலீடு செய்யப்பட்டுள்ளதாகவும், 2024ஆம் ஆண்டு முதல் மட்டும் சுமார் ரூ.6 லட்சம் கோடி முதலீடு வந்துள்ளதாகவும் தெரிவித்தார். இந்தத் துறையில் 2030ஆம் ஆண்டுக்குள் ரூ.20 லட்சம் கோடி, அதாவது 220 பில்லியன் டாலருக்கும் அதிகமான முதலீட்டு வாய்ப்புகள் உருவாகும் எனவும் கூறினார்.

மேலும், அடுத்த 10 முதல் 11 ஆண்டுகளில் 500 ஜிகாவாட் கூடுதல் புதைபடிவமற்ற எரிசக்தி உற்பத்தித் திறனை உருவாக்க இலக்கு நிர்ணயிக்கப்பட்டுள்ளதாகவும் அவர் தெரிவித்தார். சூரிய மின்சக்தி, பசுமை ஹைட்ரஜன், மின்சார சேமிப்பு மற்றும் உள்நாட்டு உற்பத்தித் துறைகளில் முதலீடுகளை அதிகரிக்கவும் அழைப்பு விடுத்தார்.