கச்சா எண்ணெய் விலை உயர்வால் அதிர்ச்சி! தினமும் ரூ.530 கோடி நஷ்டத்தை சந்திக்கும் எண்ணெய் நிறுவனங்கள்
சர்வதேச சந்தையில் கச்சா எண்ணெய் விலை தொடர்ந்து உயர்ந்து வரும் நிலையில், இந்தியாவின் பொதுத்துறை எண்ணெய் நிறுவனங்களான இந்தியன் ஆயில் (IOC), பாரத் பெட்ரோலியம் (BPCL), இந்துஸ்தான் பெட்ரோலியம் (HPCL) ஆகியவை கடும் நிதி நெருக்கடியை எதிர்கொண்டு வருகின்றன.
செப்டம்பர் 21 நிலவரப்படி, இந்திய கச்சா எண்ணெய் கூடை விலை ஒரு பீப்பாய்க்கு 117.4 டாலராக உயர்ந்துள்ளது. கடந்த 2025-26 நிதியாண்டின் சராசரி விலை 66 டாலராக இருந்த நிலையில், தற்போது விலை கணிசமாக உயர்ந்துள்ளது.
கச்சா எண்ணெய் விலை உயர்ந்தாலும், உள்நாட்டில் பெட்ரோல் மற்றும் டீசல் சில்லரை விலையில் கடந்த சில மாதங்களாக பெரிய மாற்றம் செய்யப்படவில்லை. இதனால் எண்ணெய் நிறுவனங்களுக்கு விற்பனையில் இழப்பு ஏற்பட்டு வருகிறது.
ICRA மதிப்பீட்டின்படி, தற்போது ஒரு லிட்டர் டீசல் விற்பனையில் சுமார் ரூ.9, பெட்ரோலில் ரூ.8 மற்றும் ஒரு LPG சிலிண்டரில் சுமார் ரூ.300 வரை இழப்பு ஏற்படுவதாக கூறப்படுகிறது. இதன் காரணமாக மூன்று நிறுவனங்களுக்கும் சேர்த்து தினசரி எரிபொருள் விற்பனையில் சுமார் ரூ.530 கோடி நஷ்டம் ஏற்படுவதாக மதிப்பிடப்பட்டுள்ளது.
மேற்காசியாவில் நிலவும் புவிசார் அரசியல் பதற்றம், எண்ணெய் விநியோகத்தில் ஏற்பட்டுள்ள சிக்கல்கள் உள்ளிட்ட காரணங்களால் சர்வதேச சந்தையில் கச்சா எண்ணெய் விலை உயர்ந்துள்ளதாக தெரிவிக்கப்படுகிறது.
இந்தியாவின் கச்சா எண்ணெய் தேவையில் 88 சதவீதத்துக்கும் அதிகமான அளவு இறக்குமதியை சார்ந்துள்ளது. இதனால் சர்வதேச விலை உயர்வு இந்திய எண்ணெய் நிறுவனங்களின் செலவிலும் நேரடியாக தாக்கத்தை ஏற்படுத்துகிறது.
மேலும், நடப்பு நிதியாண்டின் ஏப்ரல் முதல் ஜூன் வரையிலான காலாண்டில் இந்த மூன்று நிறுவனங்களும் சேர்ந்து ரூ.18,000 கோடிக்கும் அதிகமான நிகர நஷ்டத்தை பதிவு செய்துள்ளதாக தெரிவிக்கப்பட்டுள்ளது.
எதிர்காலத்திலும் கச்சா எண்ணெய் விலை ஒரு பீப்பாய்க்கு 105 டாலருக்கும் மேல் நீடித்தால், பெட்ரோல் மற்றும் டீசல் விற்பனையில் மட்டும் இந்த நிறுவனங்களுக்கு ரூ.64,000 கோடிக்கும் அதிகமான இழப்பு ஏற்படக்கூடும் என மதிப்பிடப்பட்டுள்ளது.
கச்சா எண்ணெய் விலை 85 முதல் 90 டாலர் வரையிலான அளவில் இருந்தால் மட்டுமே எண்ணெய் நிறுவனங்களின் சுத்திகரிப்பு மற்றும் விற்பனை நடவடிக்கைகள் சமநிலையில் இருக்கும் என ICRA தெரிவித்துள்ளது. விலை இதற்கு மேல் நீடித்தால், நிதி அழுத்தம் மேலும் அதிகரிக்கக்கூடும்.
