ரூபாய் நோட்டில் காந்தியின் முகம்.. இந்த ஒரு புகைப்படம்தான் காரணமா?

இந்திய ரூபாய் நோட்டுகளை பார்க்கும்போது முதலில் நம் கவனத்தை ஈர்ப்பது மகாத்மா காந்தியின் உருவப்படம்தான். ஆனால், சுதந்திரத்திற்குப் பிறகு உடனடியாக வெளியான ரூபாய் நோட்டுகளில் காந்தியின் படம் இடம்பெறவில்லை என்பது பலருக்கும் தெரியாத தகவல்.

1947-ல் இந்தியா சுதந்திரம் பெற்ற பிறகு, ரூபாய் நோட்டுகளில் பிரிட்டிஷ் மன்னரின் உருவப்படத்திற்கு பதிலாக சாரநாத்தில் உள்ள அசோகத் தூண் சிங்கச் சின்னம் பயன்படுத்தப்பட்டது. தொடர்ந்து பல ஆண்டுகளாக இந்தியாவின் தேசிய அடையாளங்கள் மற்றும் வரலாற்று முக்கியத்துவம் வாய்ந்த காட்சிகள் நோட்டுகளில் இடம்பெற்றன.

முதன்முதலில் எப்போது காந்தி படம் வந்தது?

மகாத்மா காந்தியின் உருவப்படம் முதன்முதலில் 1969-ம் ஆண்டு, அவரது பிறந்த நூற்றாண்டை முன்னிட்டு வெளியிடப்பட்ட நினைவு ரூபாய் நோட்டில் இடம்பெற்றது.

அதன்பின்னர் 1987-ம் ஆண்டு வெளியான ரூ.500 நோட்டிலும் காந்தியின் உருவப்படம் பயன்படுத்தப்பட்டது. பின்னர் 1996-ம் ஆண்டு அறிமுகப்படுத்தப்பட்ட ‘மகாத்மா காந்தி தொடர்’ மூலம், காந்தியின் உருவப்படம் இந்திய ரூபாய் நோட்டுகளின் முக்கிய அடையாளமாக மாறியது.

அந்தப் புகைப்படம் எப்போது எடுக்கப்பட்டது ?

இன்று ரூபாய் நோட்டுகளில் நாம் பார்க்கும் காந்தியின் உருவப்படம் புதிதாக வரையப்பட்ட ஓவியம் அல்ல. இது 1946-ம் ஆண்டு எடுக்கப்பட்ட புகைப்படத்தை அடிப்படையாகக் கொண்டது.

அந்தப் புகைப்படத்தில் காந்தி, பிரிட்டிஷ் அரசியல்வாதியான லார்டு பெதிக்-லாரன்ஸுடன் இருந்தார். புகைப்படத்தில் இருந்து காந்தியின் உருவம் தனியாகத் தேர்வு செய்யப்பட்டு, ரூபாய் நோட்டில் பயன்படுத்துவதற்கு ஏற்ற வகையில் வடிவமைக்கப்பட்டது.

இந்த புகைப்படம் டெல்லியில் உள்ள அப்போதைய Viceroy’s House-ல், அதாவது தற்போதைய ராஷ்டிரபதி பவனில் எடுக்கப்பட்டதாகக் கூறப்படுகிறது.

ஏன் காந்தியின் உருவப்படம் தேர்வு செய்யப்பட்டது?

இந்திய சுதந்திரப் போராட்டத்தில் காந்தியின் முக்கிய பங்கு மற்றும் உலகளவில் இந்தியாவுடன் தொடர்புபடுத்தப்படும் முக்கியமான நபராக அவர் இருந்தது ஆகிய காரணங்களால், அவரது உருவப்படம் ரூபாய் நோட்டுகளுக்கு ஏற்ற தேசிய அடையாளமாக பார்க்கப்பட்டது.

மேலும், உருவப்படத்தில் உள்ள நுணுக்கமான விவரங்கள் கள்ளநோட்டுகளைத் தடுப்பதற்கான பாதுகாப்பு அம்சங்களிலும் உதவுகின்றன.

அதனால், இன்று நாம் சாதாரணமாக பார்க்கும் காந்தியின் உருவப்படத்துக்குப் பின்னால் 1946-ல் எடுக்கப்பட்ட ஒரு புகைப்படம் தொடங்கி, 1969, 1987 மற்றும் 1996 என பல கட்டங்களைக் கடந்து வந்த நீண்ட வரலாறு இருக்கிறது.