ஆசிய விளையாட்டுப் போட்டி 2026.. இன்று நிறைவு!
ஜப்பானில் நடைபெற்று வந்த 20-வது ஆசிய விளையாட்டுப் போட்டிகள் இன்று (அக்.4) நிறைவடைகின்றன. செப்டம்பர் 19-ம் தேதி தொடங்கிய இந்தப் போட்டிகள் 16 நாட்கள் நடைபெற்ற நிலையில், இன்று நகோயாவில் உள்ள Mizuho Park Athletic Stadium-ல் நிறைவு விழா நடைபெறுகிறது.
ஆசியாவின் பல்வேறு நாடுகளைச் சேர்ந்த ஆயிரக்கணக்கான வீரர், வீராங்கனைகள் பங்கேற்ற இந்தப் போட்டியில், தடகளம், துப்பாக்கிச் சுடுதல், குத்துச்சண்டை, ஹாக்கி, வில்வித்தை உள்ளிட்ட பல்வேறு விளையாட்டுகளில் கடுமையான போட்டிகள் நடைபெற்றன.
இந்திய அணியைப் பொறுத்தவரை, 21 தங்கம், 27 வெள்ளி, 37 வெண்கலம் என மொத்தம் 85 பதக்கங்களுடன் 4-வது இடத்தில் போட்டியை நிறைவு செய்துள்ளது.
இந்தத் தொடரில் இந்தியாவுக்கு பல்வேறு வரலாற்றுச் சிறப்புமிக்க தருணங்களும் கிடைத்துள்ளன. குறிப்பாக, வில்வித்தையில் கும்கும் மொஹோட் தனிநபர் ரிகர்வ் பிரிவில் தங்கம் வென்றதன் மூலம் புதிய சாதனை படைத்தார். துப்பாக்கிச் சுடுதலில் நீரு தந்தா உள்ளிட்ட வீரர்களும் சிறப்பான ஆட்டத்தை வெளிப்படுத்தினர்.
ஹாக்கியிலும் இந்தியாவுக்கு இரட்டை மகிழ்ச்சி கிடைத்தது. இந்திய ஆடவர் அணி மலேசியாவை 5-1 என்ற கோல் கணக்கில் வீழ்த்தி தங்கம் வென்றதுடன், 2028 லாஸ் ஏஞ்சல்ஸ் ஒலிம்பிக் போட்டிக்கான தகுதியையும் பெற்றது. இதே தொடரில் இந்திய மகளிர் ஹாக்கி அணியும் தங்கம் வென்றது.
இன்று நடைபெறும் நிறைவு விழாவில் இந்திய அணியின் கொடியை துப்பாக்கிச் சுடுதல் வீராங்கனை நீரு தந்தா ஏந்திச் செல்ல உள்ளார். இவர் இந்த ஆசிய விளையாட்டுப் போட்டியில் இரண்டு தங்கம் மற்றும் ஒரு வெள்ளிப் பதக்கம் வென்று இந்தியாவின் முக்கிய வீராங்கனைகளில் ஒருவராக திகழ்ந்துள்ளார்.
