திருச்சி விமான நிலையத்தில் புதிய வசதி.. நவம்பரில் சர்வதேச கூரியர் கார்கோ சேவை தொடக்கம்!
திருச்சி விமான நிலையத்தில் சர்வதேச கூரியர் கார்கோ சேவையை தொடங்குவதற்கான நடவடிக்கைகள் தீவிரமாக நடைபெற்று வருவதாக மதிமுக முதன்மைச் செயலாளரும், திருச்சி மக்களவை உறுப்பினருமான துரை வைகோ தெரிவித்துள்ளார்.
திருச்சி விமான நிலையத்தின் வளர்ச்சியில் சர்வதேச கூரியர் கார்கோ சேவை முக்கிய பங்கு வகிக்கும் என எதிர்பார்க்கப்படுகிறது. குறிப்பாக, திருச்சி மற்றும் சுற்றுவட்டார மாவட்டங்களைச் சேர்ந்த தொழில் நிறுவனங்கள், ஏற்றுமதியாளர்கள் மற்றும் பொதுமக்கள் வெளிநாடுகளுக்கு ஆவணங்கள் மற்றும் பொருட்களை விரைவாக அனுப்புவதற்கு இந்த சேவை உதவியாக இருக்கும்.
இதுதொடர்பாக சம்பந்தப்பட்ட அதிகாரிகளுடன் தொடர்ந்து ஆலோசனைகள் மேற்கொள்ளப்பட்டு வருவதாகவும், தேவையான ஏற்பாடுகளை விரைந்து முடித்து நவம்பர் மாதத்தில் சர்வதேச கூரியர் கார்கோ சேவையை தொடங்க நடவடிக்கை எடுக்கப்பட்டு வருவதாகவும் துரை வைகோ எம்.பி. தெரிவித்துள்ளார்.
இந்த சேவை நடைமுறைக்கு வந்தால் திருச்சி விமான நிலையத்தின் சரக்கு கையாளும் திறன் மேலும் அதிகரிக்கும். மேலும், வெளிநாடுகளுடன் வர்த்தக தொடர்பு கொண்டுள்ள நிறுவனங்கள் மற்றும் தொழில் முனைவோருக்கும் இது கூடுதல் வாய்ப்புகளை ஏற்படுத்தும் என எதிர்பார்க்கப்படுகிறது.
திருச்சி விமான நிலையம் தொடர்ந்து விரிவாக்கப்பட்டு வரும் நிலையில், சர்வதேச கூரியர் கார்கோ சேவையும் தொடங்கப்பட உள்ள தகவல் திருச்சி மக்களிடையே வரவேற்பை பெற்றுள்ளது.
