ரயிலில் தீர்ந்துபோன குழந்தையின் டயப்பர்.. 10 நிமிடத்தில் உதவிய ரயில்வே!

ரயிலில் பயணம் செய்தபோது 6 மாதக் குழந்தைக்குத் தேவையான டயப்பர்கள் தீர்ந்துபோன நிலையில், பயணி ஒருவர் விடுத்த கோரிக்கைக்கு இந்திய ரயில்வே விரைவாக உதவி செய்த சம்பவம் இணையத்தில் கவனம் பெற்றுள்ளது.

ஒடிசாவைச் சேர்ந்த தீபிபிரசாத் (Debiprasad) என்பவர் தனது 6 மாதக் குழந்தையுடன் ரயிலில் பயணம் செய்துகொண்டிருந்தார். அப்போது குழந்தைக்குத் தேவையான சிறிய அளவிலான டயப்பர்கள் தீர்ந்துவிட்டன. இதனால் என்ன செய்வதென்று தெரியாமல் இருந்த அவர், இந்திய ரயில்வேயின் புகார் மற்றும் உதவி தளமான RailMadad மூலம் உதவி கோரினார்.

காலை 10.07 மணிக்கு அவர் புகார் அளித்த நிலையில், அடுத்த 10 நிமிடங்களுக்குள் RailMadad அதிகாரிகளிடமிருந்தும் ரயிலின் உணவுப் பெட்டி மேலாளரிடமிருந்தும் அவருக்குத் தொலைபேசி அழைப்புகள் வந்ததாகத் தெரிவித்தார். தொடர்ந்து, ரயில் அடுத்ததாக நிற்கும் நிலையத்தில் குழந்தைக்குத் தேவையான டயப்பர்களை ஏற்பாடு செய்து கொடுப்பதாக ரயில்வே தரப்பில் தெரிவிக்கப்பட்டது.

அதன்படி, அடுத்த நிறுத்தத்தில் அவருக்கு டயப்பர்கள் வழங்கப்பட்டன. மேலும், டயப்பர்களுக்கான தொகையையும் தானே செலுத்தியதாக அவர் விளக்கமளித்தார். இலவசமாக எதையும் கேட்கவில்லை என்றும், பயணத்தின்போது எதிர்பாராத விதமாக டயப்பர்கள் தீர்ந்துவிட்டதால் உதவி கோரியதாகவும் அவர் குறிப்பிட்டார்.

இந்த அனுபவத்தை சமூக வலைதளமான X-இல் பகிர்ந்த அவர், புகார் அளித்ததும் விரைவாக நடவடிக்கை எடுத்த ரயில்வே ஊழியர்களைப் பாராட்டினார். இதையடுத்து, பலரும் ரயில்வேயின் விரைவான செயல்பாட்டைப் பாராட்டினர். சிலர், இந்தச் சேவையை விரைவான பொருள் விநியோக நிறுவனமான Blinkit உடன் ஒப்பிட்டுக் கருத்து தெரிவித்தனர்.

அதேநேரத்தில், குழந்தைகளுடன் பயணம் செய்யும்போது தேவையான பொருட்களை முன்கூட்டியே எடுத்துச் செல்ல வேண்டியது பெற்றோரின் பொறுப்பு என்றும் சிலர் கருத்து தெரிவித்தனர்.

இந்தச் சம்பவம், பயணத்தின்போது எதிர்பாராத தேவைகள் ஏற்படும்போது RailMadad மூலம் உதவி கோரலாம் என்பதையும், ரயில்வே ஊழியர்களின் விரைவான ஒருங்கிணைப்பு பயணிகளுக்கு எவ்வாறு உதவக்கூடும் என்பதையும் எடுத்துக்காட்டியுள்ளது. இருப்பினும், இதுபோன்ற பொருட்கள் எல்லா ரயில்களிலும் கிடைக்கும் என்று உறுதியாகக் கூற முடியாது.