உலகச் சந்தையில் இந்தியாவின் ஆதிக்கம் அதிகரிப்பு! பெட்ரோலியப் பொருட்கள் ஏற்றுமதி 46% உயர்வு!

சர்வதேச சந்தையில் இந்தியாவின் பெட்ரோலியப் பொருட்களுக்கான தேவை அதிகரித்து வருவதால், நாட்டின் ஏற்றுமதி வர்த்தகம் குறிப்பிடத்தக்க வளர்ச்சியைப் பதிவு செய்துள்ளது.

இந்தியாவின் பெட்ரோலியப் பொருட்கள் ஏற்றுமதி, கடந்த ஆண்டின் இதே காலகட்டத்துடன் ஒப்பிடும்போது 46 சதவீதம் அதிகரித்துள்ளதாகத் தகவல்கள் தெரிவிக்கின்றன. இதன் காரணமாக, நாட்டின் ஒட்டுமொத்த சரக்கு ஏற்றுமதி வளர்ச்சிக்கும் பெட்ரோலியத் துறை முக்கியப் பங்களிப்பை வழங்கியுள்ளது.

மேற்கு ஆசியாவில் நிலவும் போர் மற்றும் அரசியல் பதற்றங்கள் காரணமாக, சர்வதேச அளவில் எரிபொருள் விநியோகத்தில் பல்வேறு மாற்றங்கள் ஏற்பட்டுள்ளன. இதனால் சில நாடுகளின் ஏற்றுமதி பாதிக்கப்பட்டுள்ள நிலையில், இந்தியாவின் சுத்திகரிக்கப்பட்ட பெட்ரோலியப் பொருட்களுக்கு புதிய சந்தைகளில் வாய்ப்புகள் அதிகரித்துள்ளன.

இந்தியாவில் உள்ள நவீன எண்ணெய் சுத்திகரிப்பு நிலையங்கள் மூலம் கச்சா எண்ணெய், பெட்ரோல், டீசல் உள்ளிட்ட பயன்பாட்டுப் பொருட்களாக மாற்றப்படுகிறது. உள்நாட்டுத் தேவையைப் பூர்த்தி செய்த பிறகு கிடைக்கும் உபரி உற்பத்தியை வெளிநாடுகளுக்கு ஏற்றுமதி செய்வதன் மூலம் இந்தியா வருவாய் ஈட்டி வருகிறது.

மேலும், சர்வதேச சந்தையில் சுத்திகரிக்கப்பட்ட எரிபொருட்களின் விலை உயர்ந்திருப்பதும், ஏற்றுமதி அளவு மீண்டும் அதிகரித்திருப்பதும் இந்த வளர்ச்சிக்கு முக்கியக் காரணங்களாகக் கூறப்படுகின்றன. பாரம்பரிய சந்தைகளில் ஏற்பட்ட சரிவை ஈடுகட்டும் வகையில், ஆப்பிரிக்கா மற்றும் ஆசிய நாடுகள் உள்ளிட்ட புதிய சந்தைகளிலும் இந்தியாவின் ஏற்றுமதி வாய்ப்புகள் விரிவடைந்துள்ளன.

இதன் மூலம் இந்தியாவின் வெளிநாட்டு வர்த்தக வருவாய் அதிகரிப்பதுடன், உலகளாவிய எரிபொருள் விநியோகத்தில் நாட்டின் பங்களிப்பும் வலுப்பெறுகிறது. இருப்பினும், சர்வதேச கச்சா எண்ணெய் விலை மாற்றங்கள், போக்குவரத்துச் சிக்கல்கள் மற்றும் அரசியல் பதற்றங்கள் ஆகியவை எதிர்கால ஏற்றுமதியில் தாக்கத்தை ஏற்படுத்தக்கூடும்.