சர்க்கரை விலை உயர்வைக் கட்டுப்படுத்த அதிரடி முடிவு! எத்தனால் உற்பத்திக்கு மத்திய அரசு புதிய கட்டுப்பாடு!

இந்தியாவில் சர்க்கரை விலை உயர்ந்து வரும் நிலையில், அதன் விலையைக் கட்டுப்படுத்தவும் உள்நாட்டில் போதிய சர்க்கரை இருப்பை உறுதி செய்யவும் மத்திய அரசு எத்தனால் உற்பத்தியில் புதிய கட்டுப்பாடுகளை அறிவித்துள்ளது. இதன்படி, 2026–27 எத்தனால் விநியோக ஆண்டில் கரும்புச் சாறு, சர்க்கரைப் பாகு மற்றும் பி-ஹெவி மொலாசஸ் ஆகியவற்றிலிருந்து தயாரிக்கப்படும் எத்தனாலை எண்ணெய் நிறுவனங்கள் கொள்முதல் செய்வதற்கு கட்டுப்பாடு விதிக்கப்பட்டுள்ளது. இந்த நடவடிக்கை நவம்பர் 1 முதல் அமலுக்கு வரவுள்ளதாகத் தெரிவிக்கப்பட்டுள்ளது.

இந்தியாவில் சர்க்கரைக்கான தேவை அதிகமாக உள்ள நிலையில், பருவமழைப் பற்றாக்குறை மற்றும் கரும்பு விளைச்சல் குறித்த கவலைகள் உற்பத்தியைப் பாதிக்கக்கூடும் என்ற அச்சம் நிலவுகிறது. இதனால் சர்க்கரை விலை உயர்வதைத் தடுக்க, உணவுப் பயன்பாட்டிற்கான சர்க்கரை இருப்புக்கு முன்னுரிமை அளிப்பதே அரசின் முக்கிய நோக்கமாகும்.

இதற்கிடையில், பெட்ரோலுடன் எத்தனாலைக் கலந்து பயன்படுத்தும் திட்டத்தையும் மத்திய அரசு தொடர்ந்து செயல்படுத்தி வருகிறது. கச்சா எண்ணெய் இறக்குமதியைக் குறைப்பதும், அந்நியச் செலாவணியைச் சேமிப்பதும் இந்தத் திட்டத்தின் முக்கிய நோக்கங்களாகும்.

சர்க்கரை உற்பத்திக்குப் பயன்படுத்தப்படும் கரும்பை எத்தனால் தயாரிப்புக்குத் திருப்பிவிடுவதைக் கட்டுப்படுத்துவதன் மூலம், சர்க்கரை உற்பத்திக்குக் கூடுதல் மூலப்பொருட்கள் கிடைக்கும் என அரசு எதிர்பார்க்கிறது. அதேவேளையில், எத்தனால் கலப்புத் திட்டம் பாதிக்கப்படாமல் இருக்க மக்காச்சோளம், உடைந்த அரிசி மற்றும் இந்திய உணவுக் கழகத்திடம் உள்ள உபரி அரிசி போன்ற மாற்று மூலப்பொருட்களிலிருந்து எத்தனால் தயாரிக்க ஊக்குவிக்கப்படுகிறது.

புதிய விநியோக ஆண்டிற்காக சுமார் 11 பில்லியன் லிட்டர் எத்தனால் கொள்முதல் செய்ய எண்ணெய் நிறுவனங்கள் டெண்டர் வெளியிட்டுள்ளன. இந்தப் புதிய கட்டுப்பாடுகள் சர்க்கரை இருப்பையும் விலையையும் எவ்வாறு பாதிக்கும் என்பது இனிவரும் காலங்களில் தெரியவரும்.