அசாம் மாணவிக்கு நேர்ந்தது என்ன? ஆந்திராவில் சிறப்புப் புலனாய்வுக் குழு அமைப்பு!

ஆந்திரப் பிரதேச மாநிலம் ஸ்ரீகாகுளம் மாவட்டத்தில் ரயில் தண்டவாளம் அருகே அசாம் மாநிலத்தைச் சேர்ந்த கல்லூரி மாணவி ஹிமாஸ்ரீ போரா உயிரிழந்த சம்பவம் தொடர்பாக, சிறப்புப் புலனாய்வுக் குழுவை (SIT) காவல்துறை அமைத்துள்ளது.

20 வயதான ஹிமாஸ்ரீ போரா, அசாம் மாநிலம் கவுகாத்தியில் உள்ள பி. போரூவா கல்லூரியில் பிபிஏ படித்து வந்தார். நடன நிகழ்ச்சியில் பங்கேற்பதற்காக ஆந்திரப் பிரதேசத்திற்குச் சென்றிருந்த அவர், பின்னர் ரயில் மூலம் தனது சொந்த ஊருக்குத் திரும்பிக் கொண்டிருந்தார்.

கடந்த அக்டோபர் 6ஆம் தேதி விசாகப்பட்டினம் ரயில் நிலையத்திலிருந்து விவேக் எக்ஸ்பிரஸ் ரயிலில் பயணம் செய்த அவர், ரயிலில் சில ஆண்கள் மது அருந்தியபடி இருந்ததால் அசௌகரியமாக உணர்வதாகத் தனது நண்பர்களிடம் தெரிவித்ததாகக் கூறப்படுகிறது. மேலும், பயணத்தின்போது ஒரு காணொளியையும் நண்பருக்கு அனுப்பியுள்ளார்.

அதன்பிறகு அவரைத் தொடர்புகொள்ள முடியாததால், அவரது நண்பர்கள் ரயில்வே உதவி எண்ணைத் தொடர்புகொண்டு தகவல் தெரிவித்துள்ளனர். ரயில்வே பாதுகாப்புப் படையினர் ரயிலில் சோதனை மேற்கொண்டபோதும் மாணவியைக் கண்டுபிடிக்க முடியவில்லை. பின்னர், அக்டோபர் 7ஆம் தேதி ஸ்ரீகாகுளம் மாவட்டத்தில் பெனுபர்த்தி கிராமத்திற்கு அருகே ரயில் தண்டவாளம் ஓரத்தில் அவரது உடல் கண்டெடுக்கப்பட்டது.

இந்தச் சம்பவம் தொடர்பாக விசாரணையைத் தீவிரப்படுத்தியுள்ள காவல்துறை, சிறப்புப் புலனாய்வுக் குழுவுடன் தடயவியல் நிபுணர்கள், தடயங்களைச் சேகரிக்கும் குழுவினர், மோப்ப நாய்கள் மற்றும் ட்ரோன் குழுக்களையும் விசாரணையில் ஈடுபடுத்தியுள்ளது. சம்பவம் நடைபெற்ற இடம் மற்றும் அதைச் சுற்றியுள்ள பகுதிகளில் ஆய்வு மேற்கொள்ளப்பட்டு வருகிறது.

இதற்கிடையில், மாணவியின் குடும்பத்தினர் இந்தச் சம்பவத்தில் சந்தேகம் இருப்பதாகக் கூறி, விரிவான விசாரணை நடத்த வேண்டும் என வலியுறுத்தியுள்ளனர். ரயில் நிலையங்களிலுள்ள சிசிடிவி காட்சிகள், தொலைபேசி அழைப்பு விவரங்கள் மற்றும் பயணிகளின் வாக்குமூலங்கள் உள்ளிட்டவை ஆய்வு செய்யப்பட்டு வருகின்றன.

முதற்கட்ட விசாரணையில், மாணவி ஓடும் ரயிலிலிருந்து தவறி விழுந்திருக்கலாம் எனத் தெரிவிக்கப்பட்டுள்ளது. இருப்பினும், அவர் உயிரிழந்ததற்கான முழுமையான காரணம் மற்றும் சம்பவத்திற்கு வழிவகுத்த சூழ்நிலைகள் குறித்து விசாரணை தொடர்ந்து நடைபெற்று வருகிறது.

சிறப்புப் புலனாய்வுக் குழுவின் விசாரணை முடிவில், இந்தச் சம்பவத்தின் பின்னணி குறித்த கூடுதல் விவரங்கள் தெரியவரும் என எதிர்பார்க்கப்படுகிறது.