கனமழையால் ரத்தான விஜய்யின் கேரள பயணம்! கடைசி நேரத்தில் ஏற்பட்ட மாற்றம்!

கோவையில் பெய்த கனமழை மற்றும் கேரளாவின் திருச்சூரில் நிலவிய மோசமான வானிலை காரணமாக, தமிழக முதலமைச்சர் விஜய்யின் கேரள பயணம் ரத்து செய்யப்பட்டுள்ளது.

கோவை காந்திபுரத்தில் ரூ.300 கோடி மதிப்பில் கட்டப்பட்டுள்ள பெரியார் அறிவுலகத்தைத் திறந்து வைப்பதற்காக, இன்று காலை சென்னையில் இருந்து தனி விமானம் மூலம் விஜய் கோவை வந்தார். தொடர்ந்து, விமான நிலையத்திலிருந்து காந்திபுரம் வரை ரோடு ஷோ சென்றபடி பொதுமக்களைச் சந்தித்தார். பின்னர் பெரியார் அறிவுலகத்தைத் திறந்து வைத்தார்.

கேரளா செல்லத் திட்டம்!

கோவையில் நிகழ்ச்சிகளை முடித்துவிட்டு, மதியம் 2 மணியளவில் ஹெலிகாப்டர் மூலம் கேரள மாநிலம் திருச்சூருக்குச் செல்ல விஜய் திட்டமிட்டிருந்தார். அங்கு நடைபெறும் நவராத்திரி கொலு நிகழ்ச்சியில் அவர் பங்கேற்க இருந்ததாகத் தகவல்கள் தெரிவிக்கின்றன.

ஆனால், கோவையில் திடீரென கனமழை பெய்யத் தொடங்கியதால் ஹெலிகாப்டர் புறப்படுவதில் தாமதம் ஏற்பட்டது. அதேபோல், திருச்சூரிலும் பரவலாக மழை பெய்து வருவதுடன், பலத்த காற்று வீசக்கூடும் என்ற தகவலும் கிடைத்தது.

பாதுகாப்பு அதிகாரிகள் ஆய்வு!

விஜய் இசட் பிளஸ் பாதுகாப்பில் இருப்பதால், அவரது பயணத்திற்கான பாதுகாப்பு ஏற்பாடுகள் மற்றும் ஹெலிகாப்டர் பயணத்துக்கு ஏற்ற வானிலை நிலவுகிறதா என்பது குறித்து அதிகாரிகள் ஆய்வு செய்தனர். தொடர்ந்து நிலவிய மோசமான வானிலையைக் கருத்தில் கொண்டு, விஜய்யின் கேரள பயணம் ரத்து செய்யப்பட்டது.

இதையடுத்து, கோவையில் இருந்து தனி விமானம் மூலம் அவர் சென்னை திரும்புவதற்கான ஏற்பாடுகள் மேற்கொள்ளப்பட்டன. கனமழையையும் பொருட்படுத்தாமல் தன்னைக் காண வந்திருந்த மக்களைச் சந்தித்து, குடை பிடித்தபடி திறந்த வேனில் நின்று விஜய் கையசைத்துச் சென்றார்.

இதனால், திட்டமிட்டபடி நடைபெறவிருந்த விஜய்யின் கேரள பயணம் வானிலை காரணமாகக் கடைசி நேரத்தில் ரத்து செய்யப்பட்டுள்ளது.