தமிழகத்தில் மழை வெளுக்கப்போகுது.. வங்கக்கடலில் உருவாகும் புதிய காற்றழுத்தத் தாழ்வுப் பகுதி!
தமிழகத்தில் வடகிழக்குப் பருவமழைக்கான சூழல் உருவாகி வரும் நிலையில், வங்கக்கடலில் புதிய காற்றழுத்தத் தாழ்வுப் பகுதி உருவாக வாய்ப்புள்ளதாக இந்திய வானிலை ஆய்வு மையம் தெரிவித்துள்ளது. இதனால் தமிழகத்தின் கடலோர மாவட்டங்களில் மழைப்பொழிவு அதிகரிக்குமா என்ற எதிர்பார்ப்பு எழுந்துள்ளது.
தற்போது தெற்கு கடலோர கேரளப் பகுதிகளின் மேல் நிலவும் வளிமண்டலச் சுழற்சி காரணமாக, இன்று (அக்டோபர் 9) கோவை, நீலகிரி, தேனி, திண்டுக்கல், தென்காசி, திருநெல்வேலி, மதுரை, விருதுநகர் மற்றும் கன்னியாகுமரி உள்ளிட்ட மாவட்டங்களில் ஓரிரு இடங்களில் கனமழை பெய்ய வாய்ப்புள்ளதாகத் தெரிவிக்கப்பட்டுள்ளது. இடி, மின்னல் மற்றும் பலத்த காற்றும் வீசக்கூடும் எனக் கணிக்கப்பட்டுள்ளது.
இதற்கிடையே, அக்டோபர் 11ஆம் தேதி வாக்கில் அந்தமான் கடல் பகுதியில் வளிமண்டல மேலடுக்குச் சுழற்சி உருவாக வாய்ப்புள்ளது. இதன் தொடர்ச்சியாக, அக்டோபர் 13ஆம் தேதி தென்கிழக்கு வங்கக்கடலில் புதிய காற்றழுத்தத் தாழ்வுப் பகுதி உருவாகக்கூடும் என வானிலை ஆய்வு மையம் கணித்துள்ளது.
இந்தத் தாழ்வுப் பகுதி அடுத்தடுத்த நாட்களில் வலுப்பெற்று வடமேற்குத் திசையில் நகர்ந்து வட தமிழகம் மற்றும் தெற்கு ஆந்திரக் கடற்கரைப் பகுதிகளை நோக்கிச் செல்ல வாய்ப்புள்ளதாகக் கூறப்படுகிறது. இதன் நகர்வைப் பொறுத்து தமிழகத்தின் கடலோர மாவட்டங்களில் மழை அதிகரிக்கக்கூடும்.
சென்னையைப் பொறுத்தவரை, இன்று வானம் ஓரளவு மேகமூட்டத்துடன் காணப்படலாம். இரவு மற்றும் அதிகாலை நேரங்களில் சில இடங்களில் லேசான மழை பெய்ய வாய்ப்புள்ளதாகத் தெரிவிக்கப்பட்டுள்ளது.
எனவே, பொதுமக்கள் இந்திய வானிலை ஆய்வு மையத்தின் அதிகாரப்பூர்வ அறிவிப்புகளைத் தொடர்ந்து கவனிக்க வேண்டும். கனமழை எச்சரிக்கை விடுக்கப்படும் பகுதிகளில் தேவையான முன்னெச்சரிக்கை நடவடிக்கைகளை மேற்கொள்ளவும் அறிவுறுத்தப்படுகிறது.
