மதுராந்தகம் vs தாராபுரம்.. தேர்தல் முடிவை எதிர்பார்த்து அரசியல் கட்சிகள்!

தமிழக அரசியல் வட்டாரத்தில் பெரும் எதிர்பார்ப்பை ஏற்படுத்தியுள்ள மதுராந்தகம் மற்றும் தாராபுரம் சட்டமன்றத் தொகுதிகளுக்கான இடைத்தேர்தல் வாக்கு எண்ணிக்கை இன்று (அக்டோபர் 9) காலை 8 மணிக்குத் தொடங்கியது. இரு தொகுதிகளிலும் பதிவான வாக்குகள் எண்ணப்பட்டு வரும் நிலையில், எந்தக் கட்சி வெற்றி பெறும் என்ற எதிர்பார்ப்பு அதிகரித்துள்ளது.

அக்டோபர் 6-ம் தேதி நடைபெற்ற வாக்குப்பதிவில், மதுராந்தகம் தொகுதியில் 86.26 சதவீதமும், தாராபுரம் தொகுதியில் 80.30 சதவீதமும் வாக்குகள் பதிவாகின. மதுராந்தகத்தில் 27 வேட்பாளர்களும், தாராபுரத்தில் 22 வேட்பாளர்களும் போட்டியிட்டனர்.

மதுராந்தகம் தொகுதியில் தமிழக வெற்றிக் கழகம் சார்பில் மரகதம் குமரவேல், திமுக சார்பில் பரந்தாமன், அதிமுக சார்பில் கனிதா சம்பத் ஆகியோர் போட்டியிட்டுள்ளனர். வாக்கு எண்ணிக்கையின் ஆரம்பச் சுற்றுகளில் இருந்தே தவெக வேட்பாளர் மரகதம் குமரவேல் முன்னிலை பெற்று வருகிறார். எட்டாவது சுற்று முடிவில் அவர் 30,785 வாக்குகளைப் பெற்று, திமுக வேட்பாளரை விட 10,336 வாக்குகள் முன்னிலையில் இருந்தார்.

மறுபுறம், தாராபுரம் தொகுதியில் தவெக வேட்பாளர் சத்யபாமா, அதிமுக வேட்பாளர் பானுமதி, திமுக வேட்பாளர் சுகன்யா ஆகியோருக்கு இடையே போட்டி நிலவுகிறது. இங்கு வாக்கு எண்ணிக்கையின்போது முன்னிலை மாறி மாறிக் காணப்படுகிறது. ஆறாவது சுற்று முடிவில் சத்யபாமா 16,201 வாக்குகளுடன் முன்னிலை பெற்றிருந்தார்.

இரு தொகுதிகளிலும் வாக்கு எண்ணிக்கை தொடர்ந்து நடைபெற்று வருவதால், இறுதி முடிவுகள் அறிவிக்கப்பட்ட பின்னரே வெற்றி பெற்ற வேட்பாளர்கள் குறித்த முழுமையான நிலவரம் தெரியவரும். இந்த இடைத்தேர்தல் முடிவுகள் தமிழக அரசியல் களத்தில் முக்கியத்துவம் பெற்றுள்ளன.