கரும்பு விவசாயிகளுக்கு ரூ.603.34 கோடி ஊக்கத்தொகை ஒதுக்கீடு.. தீபாவளிக்கு வங்கிக் கணக்கில் பணம்!

தமிழ்நாட்டில் கரும்பு விவசாயிகளுக்கு சிறப்பு ஊக்கத்தொகை வழங்குவதற்காக ரூ.603.34 கோடி நிதி ஒதுக்கீடு செய்து தமிழக அரசு அரசாணை வெளியிட்டுள்ளது. இதன் மூலம் சுமார் 90,000 கரும்பு விவசாயிகள் பயனடைவார்கள் எனத் தெரிவிக்கப்பட்டுள்ளது.

டன் ஒன்றுக்கு ரூ.709.50 சிறப்பு ஊக்கத்தொகை!

2025–2026ஆம் ஆண்டு கரும்பு அரவைப் பருவத்தில் சர்க்கரை ஆலைகளுக்குக் கரும்பு வழங்கிய விவசாயிகளுக்கு, மாநில அரசின் சார்பில் டன் ஒன்றுக்கு ரூ.709.50 சிறப்பு ஊக்கத்தொகையாக வழங்கப்பட உள்ளது. இதற்காக மாநில அரசின் நிதியிலிருந்து ரூ.603.34 கோடி ஒதுக்கப்பட்டுள்ளது.

மத்திய அரசு நிர்ணயித்துள்ள நியாயமான மற்றும் ஆதாய விலையான டன் ஒன்றுக்கு ரூ.3,290.50 உடன், தமிழக அரசின் சிறப்பு ஊக்கத்தொகையான ரூ.709.50 சேர்க்கப்படுவதால், 9.5 சதவீத சர்க்கரைக் கட்டுமானம் கொண்ட கரும்புக்கு டன் ஒன்றுக்கு மொத்தம் ரூ.4,000 கிடைக்கும். சர்க்கரைக் கட்டுமானம் 9.5 சதவீதத்துக்கு மேல் இருந்தால், அதற்கேற்ப கூடுதல் விலை கிடைக்கும்.

90,000 விவசாயிகள் பயனடைவார்கள்!

தமிழகத்தில் உள்ள 29 சர்க்கரை ஆலைகளுக்குக் கரும்பு வழங்கிய தகுதியான விவசாயிகளுக்கு இந்த ஊக்கத்தொகை வழங்கப்பட உள்ளது. இதில் 12 கூட்டுறவு சர்க்கரை ஆலைகள், 2 பொதுத்துறை ஆலைகள் மற்றும் 15 தனியார் சர்க்கரை ஆலைகள் அடங்கும்.

2025 அக்டோபர் 1 முதல் 2026 செப்டம்பர் 30 வரை பதிவு செய்து கரும்பு வழங்கிய விவசாயிகள் இத்திட்டத்தின் கீழ் பயனடைவார்கள். இடைத்தரகர்கள் மூலம் கொள்முதல் செய்யப்பட்ட அல்லது பதிவு செய்யப்படாத கரும்புக்கு இந்த ஊக்கத்தொகை கிடைக்காது எனத் தெரிவிக்கப்பட்டுள்ளது.

தீபாவளி முதல் பணம் வழங்கத் திட்டம்!

தகுதியான விவசாயிகளின் ஆதார் இணைக்கப்பட்ட வங்கிக் கணக்குகளில் ஊக்கத்தொகையை நேரடியாகச் செலுத்த நடவடிக்கை எடுக்கப்பட்டுள்ளது. விவசாயிகளின் விவரங்கள் சரிபார்க்கப்பட்ட பிறகு, தீபாவளிப் பண்டிகையை ஒட்டி பணம் வழங்கும் நடவடிக்கை தொடங்கும் எனத் தெரிவிக்கப்பட்டுள்ளது.

கரும்பு விவசாயிகளின் நீண்டகால கோரிக்கையை நிறைவேற்றவும், அவர்களின் வருமானத்தை உயர்த்தவும் இந்த ஊக்கத்தொகை உதவும் என அரசு தெரிவித்துள்ளது.