2031 தேர்தலில் நயன்தாரா போட்டியா? அரசியல் கேள்விக்கு விக்னேஷ் சிவன் பதில்!

தமிழக அரசியலில் நடிகர் விஜய்யின் வருகைக்குப் பிறகு, திரையுலகைச் சேர்ந்த மேலும் யார் அரசியலில் களமிறங்குவார்கள் என்ற எதிர்பார்ப்பு அதிகரித்துள்ளது. இந்தச் சூழலில், லேடி சூப்பர் ஸ்டார் நயன்தாரா 2031-ம் ஆண்டு சட்டமன்றத் தேர்தலில் அரசியலுக்கு வருவாரா என்ற கேள்வி தற்போது பேசுபொருளாகியுள்ளது.

தமிழ் சினிமாவில் முன்னணி நடிகையாக வலம் வரும் நயன்தாரா, திருமணத்திற்குப் பிறகும் தொடர்ந்து படங்களில் நடித்து வருகிறார். இயக்குநர் விக்னேஷ் சிவனைத் திருமணம் செய்துகொண்ட அவருக்கு இரட்டை ஆண் குழந்தைகள் உள்ளனர். சினிமா மற்றும் குடும்ப வாழ்க்கை என இரண்டிலும் கவனம் செலுத்தி வரும் நயன்தாரா அரசியலுக்கு வருவாரா என்ற கேள்வி எழுந்துள்ளது.

விக்னேஷ் சிவன் சொன்ன பதில் என்ன?

சென்னையில் நடைபெற்ற நிகழ்ச்சி ஒன்றில், நயன்தாரா அரசியலுக்கு வருவாரா என்று அவரது கணவரும் இயக்குநருமான விக்னேஷ் சிவனிடம் செய்தியாளர்கள் கேள்வி எழுப்பினர்.

இதற்குப் பதிலளித்த விக்னேஷ் சிவன், “இப்போது அவர் தாயாகிவிட்டார். குடும்பத்தையும் வீட்டையும் கவனிப்பதில் ஈடுபட்டு வருகிறார். அதில் அவருக்கு நிறைவும் மகிழ்ச்சியும் கிடைக்கிறது” என்று தெரிவித்துள்ளார்.

2031-ல் அரசியல் என்ட்ரி இருக்குமா?

தமிழக அரசியலில் நடிகர்களின் வருகை குறித்த விவாதங்கள் அதிகரித்து வரும் நிலையில், நயன்தாராவின் பெயரும் தற்போது அடிபடுகிறது. இருப்பினும், அவர் அரசியலுக்கு வருவது குறித்து இதுவரை எந்த அதிகாரப்பூர்வ அறிவிப்பும் வெளியாகவில்லை.

விக்னேஷ் சிவனின் பதில், நயன்தாரா தற்போது குடும்ப வாழ்க்கைக்கு முக்கியத்துவம் அளித்து வருவதைச் சுட்டிக்காட்டுகிறது. இதை வைத்து அவர் எதிர்காலத்தில் அரசியலுக்கு வரவே மாட்டார் என்று உறுதியாகக் கூற முடியாது. 2031-ம் ஆண்டு தேர்தலில் அவர் அரசியலில் களமிறங்குவாரா என்பது காலப்போக்கில்தான் தெரியவரும்.