TNPSC குரூப் 2, 2ஏ தேர்வர்களுக்கு குட் நியூஸ்! ஹால் டிக்கெட் வெளியீடு!

தமிழ்நாடு அரசுப் பணியாளர் தேர்வாணையம் (TNPSC) நடத்தும் குரூப் 2 மற்றும் குரூப் 2ஏ முதல்நிலைத் தேர்வுக்கான ஹால் டிக்கெட் இன்று (அக்டோபர் 21) வெளியிடப்பட்டுள்ளது. இதனால் தேர்வுக்கு விண்ணப்பித்துள்ள தேர்வர்கள் மகிழ்ச்சியடைந்துள்ளனர்.

நவம்பர் 1-ம் தேதி தேர்வு!

தமிழக அரசின் பல்வேறு துறைகளில் காலியாக உள்ள பணியிடங்களை நிரப்புவதற்காக டிஎன்பிஎஸ்சி சார்பில் குரூப் 2 மற்றும் குரூப் 2ஏ தேர்வுகளுக்கான அறிவிப்பு கடந்த ஆகஸ்ட் 11-ம் தேதி வெளியிடப்பட்டது. இதற்கான விண்ணப்பங்கள் செப்டம்பர் 9-ம் தேதி வரை பெறப்பட்டன.

முதலில் அறிவிக்கப்பட்ட காலிப்பணியிடங்களின் எண்ணிக்கை பின்னர் அதிகரிக்கப்பட்டு, மொத்தம் 846 பணியிடங்களாக உயர்த்தப்பட்டுள்ளது. இந்தத் தேர்வு முதல்நிலை மற்றும் முதன்மைத் தேர்வு என இரண்டு கட்டங்களாக நடைபெற உள்ளது.

இதன் முதல்கட்டமாக, குரூப் 2 மற்றும் குரூப் 2ஏ முதல்நிலைத் தேர்வு நவம்பர் 1-ம் தேதி நடைபெற உள்ளது.

ஹால் டிக்கெட் பதிவிறக்கம் செய்வது எப்படி?

தேர்வர்கள் https://www.tnpsc.gov.in அல்லது https://www.tnpscexams.in என்ற அதிகாரப்பூர்வ இணையதளங்களுக்குச் சென்று தங்களுடைய ஹால் டிக்கெட்டைப் பதிவிறக்கம் செய்துகொள்ளலாம்.

இதற்காகத் தேர்வர்கள் தங்களுடைய ஒருமுறைப் பதிவு (OTR) கணக்கில் உள்நுழைந்து, விண்ணப்ப எண் மற்றும் பிறந்த தேதி உள்ளிட்ட விவரங்களை உள்ளிட்டு ஹால் டிக்கெட்டைப் பெற வேண்டும்.

மேலும், ஹால் டிக்கெட்டில் குறிப்பிடப்பட்டுள்ள தேர்வு மையம், தேர்வு நேரம் மற்றும் வழிமுறைகளைத் தேர்வர்கள் கவனமாகச் சரிபார்க்க வேண்டும். தேர்வாணையம் அனுமதித்த பொருட்களைத் தவிர வேறு பொருட்களைத் தேர்வறைக்குக் கொண்டுசெல்லக் கூடாது என்றும் அறிவுறுத்தப்பட்டுள்ளது.