உ*ரிழந்த மீனவர்களின் குடும்பங்களுக்கு ரூ.7 லட்சம் நிவாரணம்!

சென்னை காசிமேடு மீன்பிடித் துறைமுகத்திலிருந்து கடலுக்குச் சென்ற தமிழக மீனவர்கள் ஆந்திரப் பிரதேச கடல் பகுதியில் உ*ரிழந்த சம்பவம் பெரும் சோகத்தை ஏற்படுத்தியுள்ளது. உ*ரிழந்த மீனவர்களின் குடும்பங்களுக்கு தலா ரூ.7 லட்சம் நிவாரணம் வழங்கப்படும் என முதலமைச்சர் சி. ஜோசப் விஜய் அறிவித்துள்ளார்.

கடந்த அக்டோபர் 29ஆம் தேதி காசிமேடு துறைமுகத்திலிருந்து 9 மீனவர்கள் விசைப்படகு மூலம் கடலுக்குள் மீன்பிடிக்கச் சென்றுள்ளனர். இதற்கிடையே வங்கக்கடலில் உருவான முரசு புயல் காரணமாக வானிலை மோசமடைந்ததால், அவர்கள் ஆந்திரப் பிரதேசத்தில் உள்ள நிசாம்பட்டினம் துறைமுகத்தில் தங்களது படகை நிறுத்தியுள்ளனர்.

பின்னர் நவம்பர் 2ஆம் தேதி இரவு ராமாயபட்டினம் நோக்கிப் புறப்பட்டபோது, நடுக்கடலில் படகின் இயந்திரம் பழுதடைந்துள்ளது. இதுகுறித்து மற்றொரு படகில் இருந்த மீனவர்களுக்கு வயர்லெஸ் மூலம் தகவல் தெரிவித்துள்ளனர். அதன் பிறகு அவர்களுடனான தொடர்பு துண்டிக்கப்பட்டது.

இதையடுத்து இந்தியக் கடலோரக் காவல் படை மற்றும் ஆந்திர மாநில அதிகாரிகள் இணைந்து தேடுதல் பணியில் ஈடுபட்டனர். இதில் இதுவரை 5 மீனவர்களின் உடல்கள் மீட்கப்பட்டுள்ளன. அவர்களில் மூன்று பேரின் அடையாளம் உறுதி செய்யப்பட்டுள்ளது. எஞ்சிய நான்கு மீனவர்களைத் தேடும் பணி தொடர்ந்து நடைபெற்று வருகிறது.

இந்நிலையில், உ*ரிழந்த மீனவர்களின் குடும்பங்களுக்கு தலா ரூ.7 லட்சம் நிவாரணம் வழங்க முதலமைச்சர் உத்தரவிட்டுள்ளார். இதில் முதல் கட்டமாக தலா ரூ.2 லட்சம் உடனடியாக வழங்கப்படும் என்றும், உ*ரிழந்தவர்களின் உடல்கள் அரசு செலவில் தமிழகம் கொண்டுவரப்படும் என்றும் தெரிவித்துள்ளார்.