பாகிஸ்தான் அணியை வீழ்த்தி இந்தியா இறுதிப்போட்டிக்கு தகுதி.. ஆசிய விளையாட்டில் அதிரடி!

ஜப்பானில் நடைபெற்று வரும் ஆசிய விளையாட்டுப் போட்டியில் ஆடவர் ஹாக்கியில் இந்திய அணி இறுதிப்போட்டிக்கு முன்னேறியுள்ளது. பரபரப்பான அரையிறுதிப் போட்டியில் பரம போட்டியாளரான பாகிஸ்தானை 4-3 என்ற கோல் கணக்கில் வீழ்த்தி இந்தியா இறுதிப்போட்டிக்குள் நுழைந்தது.

போட்டி தொடங்கிய முதலே இந்திய அணி தாக்குதல் ஆட்டத்தை வெளிப்படுத்தியது. கேப்டன் ஹர்மன்பிரீத் சிங் இரண்டு கோல்களை அடித்து இந்தியாவின் முன்னிலைக்கு வலுசேர்த்தார். தொடர்ந்து சுக்ஜீத் சிங்கும் கோல் அடிக்க, இந்தியா ஒரு கட்டத்தில் 3-0 என்ற முன்னிலையை பெற்றது.

ஆனால் அதன் பின்னர் பாகிஸ்தான் அணி சிறப்பாக விளையாடி அடுத்தடுத்து கோல்களை அடித்தது. இதனால் ஆட்டம் 3-3 என சமநிலைக்கு வந்தது. இரு அணிகளும் வெற்றிக்காக கடுமையாக போராடிய நிலையில், ஆட்டத்தின் கடைசி நிமிடங்களில் இந்தியாவுக்கு சாதகமாக திருப்புமுனை ஏற்பட்டது.

ஆட்டம் முடிவடைய சுமார் 49 வினாடிகள் மட்டுமே இருந்தபோது அபிஷேக் அடித்த கோல் இந்தியாவின் வெற்றியை உறுதி செய்தது. இதன் மூலம் இந்தியா 4-3 என்ற கணக்கில் பாகிஸ்தானை வீழ்த்தி இறுதிப்போட்டிக்கு தகுதி பெற்றது.

இறுதிப்போட்டியில் இந்திய அணி மலேசியாவை எதிர்கொள்கிறது. மற்றொரு அரையிறுதியில் மலேசியா தென் கொரியாவை 2-1 என்ற கணக்கில் வீழ்த்தி இறுதிப்போட்டிக்கு முன்னேறியது.

இதனிடையே, மகளிர் ஹாக்கியிலும் இந்திய அணி இறுதிப்போட்டிக்கு முன்னேறியுள்ளது. தென் கொரியாவை 2-0 என்ற கணக்கில் வீழ்த்திய இந்திய மகளிர் அணி, இன்று நடைபெறும் தங்கப் பதக்கத்துக்கான போட்டியில் சீனாவை எதிர்கொள்கிறது.

ஆடவர் மற்றும் மகளிர் என இரு ஹாக்கி அணிகளும் இறுதிப்போட்டிக்கு முன்னேறியிருப்பது இந்திய ஹாக்கி ரசிகர்களிடையே எதிர்பார்ப்பை அதிகரித்துள்ளது.