34 ஆயிரம் அடி உயரத்தில் விமானத்தில் நடந்தது என்ன?.. திக் திக் நிமிடங்கள்!
துபாயில் இருந்து இஸ்ரேலின் டெல் அவிவ் நகரை நோக்கி சென்ற ஃப்ளைதுபாய் விமானத்தில் 34 ஆயிரம் அடி உயரத்தில் அதிர்ச்சிகரமான சம்பவம் நடந்துள்ளது. விமானம் நடுவானில் பறந்து கொண்டிருந்தபோது, காக்பிட்டுக்குள் விமானி மற்றும் இணை விமானி இடையே திடீரென மோதல் ஏற்பட்டது.
இந்த சம்பவத்தில் இந்தியாவைச் சேர்ந்த கேப்டன் ஸ்மித் மச்சார் காயமடைந்தார். இணை விமானி அவரை தாக்கியதாக தகவல்கள் வெளியாகியுள்ளன. இதனால் விமானத்தின் கட்டுப்பாட்டில் பாதிப்பு ஏற்பட்டு, விமானம் மிக வேகமாக கீழ்நோக்கி இறங்கத் தொடங்கியது. சுமார் 30 விநாடிகளில் விமானம் 14 ஆயிரம் அடி வரை திடீரென இறங்கியதாக விமானப் போக்குவரத்து தரவுகள் தெரிவிக்கின்றன.
நிலைமை மிகவும் ஆபத்தானதாக மாறிய நிலையில், காயமடைந்திருந்த கேப்டன் ஸ்மித் மச்சார் காக்பிட் கதவைத் திறந்துள்ளார். இதையடுத்து பயணிகள் மற்றும் விமானத்தில் இருந்த பிற விமானிகள் காக்பிட்டுக்குள் சென்று தாக்குதல் நடத்திய இணை விமானியை கட்டுப்படுத்தியுள்ளனர். பின்னர் விமானத்தின் கட்டுப்பாடு மீண்டும் பெறப்பட்டு, சவுதி அரேபியாவின் தபுக் விமான நிலையத்தில் அவசரமாக தரையிறக்கப்பட்டது.
இந்த விமானத்தில் 174 பேர் இருந்ததாக ஆரம்பகட்ட தகவல்கள் தெரிவிக்கின்றன. அனைவரும் உயிருடன் மீட்கப்பட்ட நிலையில், காயமடைந்த கேப்டன் மருத்துவமனையில் சிகிச்சை பெற்று வருகிறார். இந்திய தூதரகம் அவர் நிலையான நிலையில் இருப்பதாக தெரிவித்துள்ளது.
இந்த சம்பவம் தொடர்பாக சவுதி அரேபியா, ஐக்கிய அரபு அமீரகம் உள்ளிட்ட நாடுகளின் அதிகாரிகள் விசாரணை நடத்தி வருகின்றனர். சம்பவத்திற்கான காரணம், தாக்குதலின் பின்னணி மற்றும் இது திட்டமிடப்பட்ட செயலா என்பது உள்ளிட்ட பல்வேறு கோணங்களில் விசாரணை நடைபெற்று வருகிறது.
இந்திய விமானியின் துரிதமான நடவடிக்கையும், பயணிகள் மற்றும் விமானக் குழுவினரின் ஒருங்கிணைந்த செயல்பாடும் விமானம் பாதுகாப்பாக தரையிறங்க உதவியதாக தகவல்கள் வெளியாகியுள்ளன.
