சச்சினின் 100 சதங்கள் சாதனையை கோலியால் முறியடிக்க முடியுமா? முன்னாள் வீரர்கள் சொன்ன பதில்!

வெஸ்ட் இண்டீஸ் அணிக்கு எதிரான முதல் ஒருநாள் போட்டியில் விராட் கோலி அதிரடியாக 139 ரன்கள் விளாசியதைத் தொடர்ந்து, சச்சின் டெண்டுல்கரின் 100 சர்வதேச சதங்கள் சாதனையை அவர் நெருங்குவாரா என்ற விவாதம் மீண்டும் தொடங்கியுள்ளது

இந்தப் போட்டியில் 88 பந்துகளில் ஆட்டமிழக்காமல் 139 ரன்கள் எடுத்த கோலி, தனது 55-வது ஒருநாள் சதத்தை பதிவு செய்தார். இதன் மூலம் அவரது சர்வதேச சதங்களின் எண்ணிக்கை 86 ஆக உயர்ந்தது. மேலும், ஒருநாள் கிரிக்கெட்டில் 15,000 ரன்களை கடந்த இரண்டாவது வீரர் என்ற சாதனையையும் கோலி படைத்தார்.

இதையடுத்து, சச்சின் டெண்டுல்கரின் 100 சர்வதேச சதங்கள் என்ற சாதனையை கோலியால் எட்ட முடியுமா என்ற கேள்வி கிரிக்கெட் ரசிகர்கள் மத்தியில் மீண்டும் பேசுபொருளாகியுள்ளது. கோலி ஏற்கனவே டெஸ்ட் மற்றும் டி20 சர்வதேச கிரிக்கெட்டில் இருந்து ஓய்வு பெற்றுள்ளதால், தற்போது ஒருநாள் போட்டிகளில் மட்டுமே விளையாடி வருகிறார்.

“கோலியால் முடியும்” – ரஹானே

இந்த விவகாரம் குறித்து பேசிய முன்னாள் இந்திய வீரர் அஜிங்கியா ரஹானே, கோலியால் 100 சர்வதேச சதங்களை எட்ட முடியும் என்ற நம்பிக்கையை தெரிவித்துள்ளார்.

சச்சின் டெண்டுல்கர் கோலியின் ரோல் மாடல் என்பதால், அவரது சாதனையை எட்ட வேண்டும் என்ற இலக்கு கோலிக்கு ஊக்கமாக இருக்கலாம் என்றும் ரஹானே கூறியுள்ளார். கோலி அழுத்தமான சூழ்நிலைகளில் சிறப்பாக செயல்படக்கூடியவர் என்றும் அவர் குறிப்பிட்டுள்ளார்.

அதை செய்யக்கூடியவர் கோலி மட்டும்தான்” – தினேஷ் கார்த்திக்

முன்னாள் இந்திய வீரர் தினேஷ் கார்த்திக்கும் இதுகுறித்து தனது கருத்தை தெரிவித்துள்ளார். சச்சினின் 100 சதங்கள் சாதனையை முறியடிக்கக்கூடிய வாய்ப்பு தற்போதைய கிரிக்கெட்டில் ஒருவருக்கு இருந்தால், அது விராட் கோலிதான் என்று அவர் கூறியுள்ளார்.

மேலும், கோலிக்கு இன்னும் 14 சர்வதேச சதங்கள் தேவைப்படும் நிலையில், குறைந்த எண்ணிக்கையிலான போட்டிகளில் அந்த இலக்கை எட்டுவது மிகவும் கடினமான சவாலாக இருக்கும் என்றும் தினேஷ் கார்த்திக் தெரிவித்துள்ளார். அதே நேரத்தில், இந்த சாதனையின் அழுத்தத்தை கோலி மீது சுமத்தாமல், அவரது கிரிக்கெட்டை ரசிகர்கள் ரசிப்பதே முக்கியம் என்றும் அவர் குறிப்பிட்டுள்ளார்.

தற்போது 86 சர்வதேச சதங்களுடன் இருக்கும் கோலி, சச்சினின் 100 சதங்கள் சாதனையை எட்ட இன்னும் 14 சதங்கள் அடிக்க வேண்டியுள்ளது. 2027 ஒருநாள் உலகக்கோப்பையை நோக்கி பயணிக்கும் நிலையில், இந்த சாதனையை கோலி எட்டுவாரா என்பது தொடர்ந்து கவனம் பெறும் விவாதமாகியுள்ளது.