தங்கம் வைத்திருப்பவர்களுக்கு சூப்பர் நியூஸ்.. கிராமுக்கு ரூ.10,000 வரை நகைக்கடன்!
முன்னதாக கூட்டுறவு வங்கிகளில் நகையின் எடை, தூய்மை மற்றும் நடைமுறையில் உள்ள கடன் விதிமுறைகளின் அடிப்படையில் கடன் தொகை நிர்ணயிக்கப்பட்டு வந்தது. இதற்கு முன்பு ஒரு கிராம் தங்கத்திற்கு ரூ.7,000 வரை அல்லது நகையின் சந்தை மதிப்பில் 75 சதவீதம் என்ற அடிப்படையில் கடன் வழங்கப்பட்டதாக தெரிவிக்கப்பட்டுள்ளது.
தற்போது தங்கத்தின் விலை உயர்ந்துள்ளதை கருத்தில் கொண்டு, ஒரு கிராமுக்கு வழங்கப்படும் அதிகபட்ச கடன் தொகையை ரூ.10,000 ஆக உயர்த்தும் நடவடிக்கை மேற்கொள்ளப்பட்டுள்ளது. இதன் மூலம் முன்பைவிட குறைந்த அளவு தங்க நகையை அடமானம் வைத்தே கூடுதல் தொகையை கடனாக பெறுவதற்கான வாய்ப்பு பொதுமக்களுக்கு கிடைக்கும்.
கூட்டுறவு வங்கிகள் மற்றும் கூட்டுறவு கடன் சங்கங்களில் தங்க நகைக்கடன் முக்கியமான கடன் சேவையாக இருந்து வருகிறது. குறிப்பாக அவசர மருத்துவச் செலவு, கல்விக் கட்டணம், குடும்பத் தேவைகள், சிறு தொழில் மற்றும் விவசாயம் சார்ந்த செலவுகள் உள்ளிட்ட தேவைகளுக்காக பொதுமக்கள் நகைக்கடனை பயன்படுத்தி வருகின்றனர்.
தங்க நகைக்கடனில் கடன் தொகை அதிகரிக்கப்படுவது கூட்டுறவு வங்கிகளுக்கு கூடுதல் வாடிக்கையாளர்களை ஈர்க்கவும் உதவும் என எதிர்பார்க்கப்படுகிறது. ஏற்கனவே வங்கிகள் மற்றும் நிதி நிறுவனங்களுக்கு இடையே நகைக்கடன் வழங்குவதில் போட்டி நிலவி வரும் நிலையில், கூட்டுறவு வங்கிகளும் தங்களது கடன் சேவையை அதிகரிக்கும் வகையில் இந்த நடவடிக்கையை மேற்கொண்டுள்ளன.
இருப்பினும், ஒரு கிராம் தங்கத்திற்கு ரூ.10,000 என்பது அதிகபட்ச கடன் வரம்பு என்பதால், ஒவ்வொரு நபருக்கும் ஒரு கிராமுக்கு கட்டாயமாக ரூ.10,000 வழங்கப்படும் என்று அர்த்தமில்லை. நகையின் தூய்மை, எடை, மதிப்பீடு மற்றும் சம்பந்தப்பட்ட கடன் திட்டத்தின் விதிமுறைகளுக்கு ஏற்ப இறுதியாக வழங்கப்படும் கடன் தொகை மாறுபடலாம்.
இதனால் கூட்டுறவு வங்கிகளில் தங்க நகையை அடமானம் வைத்து கடன் பெற திட்டமிடுபவர்களுக்கு இந்த மாற்றம் முக்கியத்துவம் வாய்ந்ததாக பார்க்கப்படுகிறது. தங்கத்தின் மதிப்பு அதிகரித்துள்ள நிலையில், நகைக்கடன் மூலம் கூடுதல் நிதி பெற விரும்புவோருக்கு இது பயனுள்ளதாக அமையும் என எதிர்பார்க்கப்படுகிறது.
