தீபாவளி பண்டிகையால் உச்சத்தைத் தொட்ட பூக்கள் விலை! ஒரு கிலோ மல்லிகை ரூ.2,000!
தீபாவளி பண்டிகையை முன்னிட்டு கன்னியாகுமரி மாவட்டம் தோவாளை மலர் சந்தையில் பூக்களின் விலை கடுமையாக உயர்ந்துள்ளது. பண்டிகைக் கொண்டாட்டங்களுக்காகப் பொதுமக்கள் அதிக அளவில் பூக்களை வாங்கி வரும் நிலையில், தேவை அதிகரிப்பால் விலையும் உச்சத்தை எட்டியுள்ளது.
குறிப்பாக, சந்தையில் ஒரு கிலோ மல்லிகைப் பூ ரூ.2,000-க்கும், பிச்சிப் பூ ரூ.2,500-க்கும் விற்பனை செய்யப்படுகிறது. வழக்கமான நாட்களைக் காட்டிலும் பண்டிகைக் காலத்தில் பூக்களின் தேவை அதிகரிப்பது விலை உயர்வுக்கு முக்கியக் காரணமாகக் கூறப்படுகிறது.
தீபாவளி பண்டிகையின்போது வீடுகளில் பூஜை செய்வதற்கும், வீடுகளை அலங்கரிப்பதற்கும், பெண்கள் தலையில் சூடுவதற்கும் பூக்கள் அதிக அளவில் பயன்படுத்தப்படுகின்றன. இதனால் தோவாளை மலர் சந்தையில் விற்பனை களைகட்டியுள்ளது.
மேலும், தோவாளை சந்தைக்கு கன்னியாகுமரி மாவட்டத்தின் பல்வேறு பகுதிகளில் இருந்தும், வெளி மாவட்டங்களில் இருந்தும் பூக்கள் விற்பனைக்காகக் கொண்டு வரப்படுகின்றன.
பண்டிகை நேரத்தில் பூக்களின் விலை அதிகரித்துள்ளதால் வியாபாரிகள் மகிழ்ச்சியடைந்தாலும், அதிக விலை கொடுத்து பூக்களை வாங்க வேண்டியிருப்பதால் பொதுமக்கள் சற்று அதிர்ச்சியடைந்துள்ளனர்.
