டெல்லியில் காற்று மாசுபாடு அதிகரிப்பு – பள்ளிகளுக்கு புதிய உத்தரவு!

தலைநகர் டெல்லியில் காற்று மாசுபாடு தொடர்ந்து அதிகரித்து வருவதால், பொதுமக்களின் இயல்பு வாழ்க்கை பாதிக்கப்பட்டுள்ளது. குறிப்பாக, குழந்தைகள் மற்றும் முதியவர்கள் காற்று மாசுபாட்டால் ஏற்படும் உடல்நலப் பாதிப்புகளுக்கு அதிகம் ஆளாகும் அபாயம் உள்ளதாகக் கூறப்படுகிறது. இதனைத் தொடர்ந்து, மாணவர்களின் நலனைக் கருத்தில் கொண்டு டெல்லி அரசு புதிய நடவடிக்கையை அறிவித்துள்ளது.

அதன்படி, டெல்லியில் உள்ள அரசு மற்றும் தனியார் பள்ளிகளில் 5-ஆம் வகுப்பு வரை பயிலும் மாணவர்களுக்கு நேரடி வகுப்புகளுடன் ஆன்லைன் வகுப்புகளையும் இணைத்து நடத்த உத்தரவிடப்பட்டுள்ளது. இதன் மூலம் மாணவர்கள் பள்ளிக்கு நேரடியாகச் செல்வதைக் குறைத்து, காற்று மாசுபாட்டால் ஏற்படும் பாதிப்புகளில் இருந்து அவர்களைப் பாதுகாக்க நடவடிக்கை எடுக்கப்பட்டுள்ளது.

காற்றின் தரம் தொடர்ந்து மோசமடைந்து வரும் சூழலில், குழந்தைகளின் உடல்நலத்தைப் பாதுகாப்பதற்காக இந்த முடிவு எடுக்கப்பட்டுள்ளது. மேலும், காற்று மாசுபாட்டின் நிலையைப் பொறுத்து அடுத்தகட்ட நடவடிக்கைகள் எடுக்கப்படலாம் என எதிர்பார்க்கப்படுகிறது.