செய்திகள்

கிரிக்கெட் வரலாற்றில் தோனி படைத்த சாதனைகள் எத்தனை தெரியுமா?

கிரிக்கெட் வரலாற்றில் தோனி படைத்த சாதனைகள் எத்தனை தெரியுமா?

இந்திய கிரிக்கெட் வரலாற்றில் மறக்க முடியாத பெயர்களில் ஒன்று மகேந்திர சிங் தோனி. ஒரு சாதாரண கிரிக்கெட் வீரராகத் தனது பயணத்தைத் தொடங்கி, இந்திய அணியின் வெற்றிகரமான கேப்டன்களில் ஒருவராக உயர்ந்தவர். பேட்டிங், விக்கெட் கீப்பிங், கேப்டன்சி என அனைத்திலும் தனக்கென ஒரு முத்திரையைப் பதித்துள்ளார்.

தோனியின் தலைமையில் இந்திய அணி மூன்று முக்கியமான ஐசிசி வெள்ளைப்பந்து கோப்பைகளை வென்றுள்ளது. கடந்த 2007-ஆம் ஆண்டு நடைபெற்ற முதல் டி20 உலகக்கோப்பையை இந்திய அணி கைப்பற்றியது. தொடர்ந்து 2011-ஆம் ஆண்டு நடைபெற்ற ஒருநாள் உலகக்கோப்பையையும், 2013-ஆம் ஆண்டு சாம்பியன்ஸ் டிராபியையும் வென்று வரலாறு படைத்தது. மூன்று முக்கிய ஐசிசி வெள்ளைப்பந்து கோப்பைகளையும் வென்ற ஒரே கேப்டன் என்ற பெருமையும் தோனிக்கு உண்டு.

ஐபிஎல் போட்டிகளிலும் தோனியின் சாதனை குறிப்பிடத்தக்கது. சென்னை சூப்பர் கிங்ஸ் அணியை வழிநடத்திய அவர், 2010, 2011, 2018, 2021 மற்றும் 2023 ஆகிய ஆண்டுகளில் ஐந்து முறை சாம்பியன் பட்டத்தை வென்று கொடுத்துள்ளார். மேலும், 2010 மற்றும் 2014-ஆம் ஆண்டுகளில் சாம்பியன்ஸ் லீக் டி20 கோப்பையையும் சென்னை அணி வென்றது.

தனிப்பட்ட விருதுகளைப் பொறுத்தவரை, 2008 மற்றும் 2009-ஆம் ஆண்டுகளில் தொடர்ந்து இரண்டு முறை ஐசிசி ஒருநாள் கிரிக்கெட் ஆண்டின் சிறந்த வீரர் விருதைப் பெற்றார். 2008-ஆம் ஆண்டு ராஜீவ் காந்தி கேல் ரத்னா விருதும், 2009-ஆம் ஆண்டு பத்மஸ்ரீ விருதும், 2018-ஆம் ஆண்டு பத்ம பூஷண் விருதும் வழங்கப்பட்டன. 2025-ஆம் ஆண்டு ஐசிசி ஹால் ஆஃப் ஃபேமிலும் இடம்பிடித்தார்.

சர்வதேச கிரிக்கெட்டில் 17,266 ரன்கள், 538 போட்டிகள், 839 விக்கெட் கீப்பிங் டிஸ்மிஸல்கள் எனப் பல சாதனைகளைப் படைத்துள்ளார்.

கோப்பைகள், விருதுகள் மட்டுமின்றி, பல தலைமுறை கிரிக்கெட் ரசிகர்களின் மனதில் இடம்பிடித்திருப்பதுதான் தோனியின் மிகப்பெரிய சாதனையாகப் பார்க்கப்படுகிறது.