செய்திகள்

அமெரிக்காவில் நாடு முழுவதும் விமானப் போக்குவரத்து திடீர் முடக்கம்!

அமெரிக்காவில் நாடு முழுவதும் விமானப் போக்குவரத்து திடீர் முடக்கம்!

அமெரிக்காவில் ஏற்பட்ட தொலைத்தொடர்பு கோளாறு காரணமாக, நாடு முழுவதும் விமானப் போக்குவரத்து தற்காலிகமாக முடங்கியது. நவம்பர் 13ஆம் தேதி விமானப் போக்குவரத்துக் கட்டுப்பாட்டு மையங்களுக்கும் விமானிகளுக்கும் இடையிலான தகவல் தொடர்பில் திடீர் பாதிப்பு ஏற்பட்டது. இதையடுத்து, அமெரிக்காவின் ஃபெடரல் ஏவியேஷன் அட்மினிஸ்ட்ரேஷன் (FAA) நாடு முழுவதும் விமானங்கள் புறப்படுவதற்கு தற்காலிகத் தடை விதித்தது.

இந்தத் தகவல் தொடர்பு பாதிப்பால் விமானப் போக்குவரத்தைக் கண்காணிப்பதிலும், விமானிகளுக்கு உரிய வழிகாட்டுதல்களை வழங்குவதிலும் சிக்கல் ஏற்பட்டது. இதனால் பயணிகளின் பாதுகாப்பைக் கருத்தில் கொண்டு முன்னெச்சரிக்கை நடவடிக்கையாக விமானச் சேவைகள் நிறுத்தப்பட்டன. இதன் காரணமாக அமெரிக்காவின் முக்கிய விமான நிலையங்களில் பயணிகள் கடும் சிரமத்திற்கு உள்ளாகினர். பலர் தங்களது பயணத் திட்டங்களை மாற்ற வேண்டிய சூழலும் உருவானது.

இதற்கிடையில், இந்தத் தொலைத்தொடர்பு கோளாறு சைபர் தாக்குதலால் ஏற்பட்டதற்கான எந்தவித ஆதாரமும் இல்லை என அமெரிக்க அதிகாரிகள் தெரிவித்தனர். தொழில்நுட்பக் கோளாறைச் சரிசெய்யும் பணிகள் தீவிரமாக மேற்கொள்ளப்பட்டன. தொடர்ந்து, சுமார் 5 மணி நேரத்திற்குப் பிறகு விமானப் போக்குவரத்துக்கான தற்காலிகத் தடை நீக்கப்பட்டது. இருப்பினும், ஏற்கெனவே ஏற்பட்ட பாதிப்பின் காரணமாக ஏராளமான விமானங்கள் தாமதமாக இயக்கப்பட்டதுடன், சில விமானங்கள் ரத்து செய்யப்பட்டன. இந்தச் சம்பவம் அமெரிக்காவின் விமானப் போக்குவரத்துத் துறையில் தகவல் தொடர்பு அமைப்புகளின் முக்கியத்துவத்தை மீண்டும் உணர்த்தியுள்ளது.